ఖానాపూర్ గ్రామంలో వినాయక స్వామి వారి తొలి పూజ

రంగారెడ్డి జిల్లా, సెప్టెంబర్ 15 (పబ్లిక్ వైబ్): గండిపేట మండలం పరిధిలోని ఖానాపూర్ గ్రామంలో శ్రీ వరసిద్ధి వినాయక స్వామి వారి ఉత్సవాలు అత్యంత వైభవంగా ప్రారంభమయ్యాయి. పండుగ సందర్భంగా గ్రామంలో ఏర్పాటు చేసిన వినాయక మండపంలో గణనాథునికి తొలి పూజా కార్యక్రమాన్ని శాస్త్రోక్తంగా, ఘనంగా నిర్వహించారు.

ఈ కార్యక్రమంలో గ్రామ భక్తులు, ఉత్సవ కమిటీ సభ్యులు పెద్ద సంఖ్యలో పాల్గొని విఘ్నేశ్వరునికి ప్రత్యేక అభిషేకాలు, పూజలు నిర్వహించారు. సర్వవిఘ్నాలు తొలగి, గ్రామం సుభిక్షంగా ఉండాలని, ప్రజలందరికీ ఆయురారోగ్యాలు చేకూరాలని స్వామి వారిని ప్రార్థించినట్లు నిర్వాహకులు తెలిపారు.

మండప నిర్వాహకులు భక్తులకు ఎలాంటి అసౌకర్యం కలగకుండా ప్రత్యేక ఏర్పాట్లు చేశారు. పూజా అనంతరం భక్తులకు తీర్థప్రసాద వితరణ చేపట్టారు. గణపతి బప్పా మోరియా నినాదాలతో ఖానాపూర్ గ్రామం ఆధ్యాత్మిక శోభతో మురిసిపోయింది.