హైదరాబాద్ రామంతాపూర్‌లో హైడ్రా కూల్చివేతలు..

హైదరాబాద్ అక్టోబర్ 31 (పబ్లిక్ వైబ్): నగరంలోని రామంతాపూర్‌ పెద్ద చెరువు పరిధిలో హైడ్రా (HYDRAA) అధికారులు మరోసారి ఉక్కుపాదం మోపారు. చెరువు పూర్తి స్థాయి నీటి మట్టం (FTL) పరిధిలో ఉందంటూ నిబంధనలకు విరుద్ధంగా నిర్మించిన ఒక భారీ షెడ్డును అధికారులు నేలమట్టం చేశారు. అయితే, దశాబ్దాలుగా ప్రభుత్వానికి అన్ని రకాల పన్నులు చెల్లిస్తున్నప్పటికీ తమ ఆస్తిని కూల్చివేయడం పట్ల యజమానులు తీవ్ర ఆవేదన వ్యక్తం చేస్తున్నారు.

కూల్చివేతకు గురైన ఆస్తి యజమానులు మీడియాతో మాట్లాడుతూ ప్రభుత్వ తీరుపై తీవ్ర నిరసన తెలిపారు.

గత 40 ఏళ్లుగా తాము క్రమం తప్పకుండా ఆస్తి పన్నులు, విద్యుత్ బిల్లులు చెల్లిస్తూ వస్తున్నామని వారు స్పష్టం చేశారు.

గత మూడు రోజులుగా అధికారులు సర్వే పేరుతో వస్తుండటంతో తాము న్యాయస్థానాన్ని (High Court) ఆశ్రయించినట్లు తెలిపారు.

ముందుగా చెరువు ఎఫ్‌టీఎల్ (FTL) హద్దులను స్పష్టంగా నిర్ధారించిన తర్వాతే చట్టపరమైన చర్యలు తీసుకోవాలని తాము కోరినప్పటికీ, అధికారులు పట్టించుకోలేదని వాపోయారు.